Логотип "Православіє в Україні"
Отримування розсилки на e-mail

Вы здесь

Редкий покаянный канон на Страстную Седмицу

Версия для печатиВерсия для печати
05 квітня 2015 | Рідкісні молитви

Келейный покаянный канон на Страстную Седмицу составлен епископом Иеремией Нижегородским. Его начинают читать с Лазаревой субботы.

Песнь 1

Ирмос: Спасителю Богу, в мори люди немокрыми ногами наставльшему, и фараона со всевоинством потопльшему, Тому Единому поим, яко прославися.

Помилуй мя, Боже, помилуй мя! (Поклон)

Душе моя, душе моя! Грядый Господь на вольную страсть, нашего ради спасения, рече возлюбленным Своим учеником: се, восходим во Иерусалим, и предается Сын Человеческий. Гряди и ты вслед Его, носящи ко Кресту Его вся беззакония твоя, и кающися в них, взывай:

Помилуй мя Боже, помилуй мя!

Душе моя, душе моя! Грядый Господь на вольную за тя смерть, на пути во Иерусалим, в Вифании, воскреси четверодневнаго смердящаго Лазаря. Припади, о душе, ко Господу и моли, да воскресит Он от смерти греховныя и тя, вопиющую с Давидом:

Помилуй мя Боже, помилуй мя!

Душе моя, душе моя! Глаголет Христос и тебе, якоже Марфе и Марии, сестрам умершаго Лазаря: Аз есмь Воскрешение и Живот, веруяй в Мя, аще и умрет, оживет. Веруй убо всемогущей силе Христа Спасителя, уповай на безпредельную благость Его и с непоколебимою верою взывай:

Помилуй мя Боже, помилуй мя!

Душе моя, душе моя! О Лазаре умершем и во гробе лежащем плакаше Марфа, плакаше ина сестра его Мария, плакаху его друзи, плакаше Сам Господь. Ты ли не восплачеши о твоем Лазаре, об уме, во гробе страстей и чувственности погребенном? Ты ли до конца пребудеши окамененна, не научившися молитися Христу и взывати:

Помилуй мя Боже, помилуй мя!

Господи, рекоста Марфа и Мария Господу, аще бы еси был зде, не бы умерл брат наш. Тоежде слово и мы с тобою, душе моя, рцем Господу: не низверглся бы в сень смертную ум наш, не изнемогла бы воля наша, не уснула бы совесть, не возобладали бы сердцем страсти, аще бы Ты, Господи, был с нами, аще мы не удалили быхом Тебе своими грехи и безстрашием, аще в нераскаянности своей не престали быхом взывати:

Помилуй мя Боже, помилуй мя!

Душе моя, душе моя! По глаголу Христа Бога: Лазаре, гряди вон,— изыде умерый, обязан рукама и ногама. О, аще бы действием и силою всемогущия благодати Христовы и ум, твой исторглся от связующих Его страстных помыслов и сатанинских обязаний, дабы неленостно взывал:

Помилуй мя Боже, помилуй мя!

Душе моя, душе моя! Воскресшему Лазарю повеле абие Господь ити: разрешите его, рече Жизнодатель, и оставите ити. Не буди и ты, в Таинствах Крещения и покаяния обновившися, недвижима и бездейственна, но доброшествуй по пути спасения, не престающи примером своим и другия наставляющи взывати:

Помилуй мя, Боже, помилуй мя.

Слава: Лазарева болезнь несть к смерти, вещаше Господь учеником Своим, но к славе Божией. И воистину: не един токмо сам воскресший Лазарь и сестры его со апостолы, но и тьмы верующих прославиша и ныне славят Христа Воскресителя, и Его Единосущнаго Отца, и Духа Святаго. О, дабы к славе Пресвятыя Троицы послужили твоя, душе моя, немощи и твои смертнии недузи, об ихже исцелении молиши ты, взывающи Отцу, и Сыну, и Святому Духу:

Помилуй мя Боже, помилуй мя!

И ныне: О Пресвятая Дево Богородице! О друже Христов Лазаре, о другини Христа и Пресвятыя Матере Его Марфо и Марие!
Помолитеся Христу Богу, да отвалит камень нечувствия от духа моего и да дарует ему живот и силу пойти и принести посильныя плоды покаяния, умильно взывающу:

Помилуй мя Боже, помилуй мя!

 

Песнь 2

Ирмос: Видите, видите, яко Аз есмь Бог, воплотивыйся от Пресвятыя Девы и распятием Своим на Кресте помиловати и спасти вас пришедый.

Помилуй мя Боже, помилуй мя!

Грядый Христос на вольную нашего ради спасения смерть, во Иерусалим торжественне внити благоволи. Мнози тысящи народа, сретающе Его, взываху: Осанна! Благословен Грядый! Ты же, о душе моя, помышляющи о согрешениих твоих и всего мира, вопий с Давидом:

Помилуй мя Боже, помилуй мя!

Иудее, Господа с горы Елеонския провождающе во град Иерусалим, иже бысть уже кровию многих пророк обагрен и крвию Самаго Богочеловека име обагритися, ризы своя по пути постилаху. Ты же, о душе моя, воспомянувши предреченное пророки и Господом, повергнися долу, в страсе и трепете взывающи:

Помилуй мя Боже, помилуй мя!

Велие усердие, велию честь Господу иудее оказаху, егда вшествоваше во Иерусалим на жребяти бели. Мнози от них ветви от древ резаху, да цветы и листвием их украсят места, по нимже шествова Господь ко храму Иерусалимскому. Ты же, о душе моя, отсецы тое жестокосердие и тыя страсти, яже возведоша Господа на Крест, и не престани взывати:

Помилуй мя Боже, помилуй мя!

В вероломнем и христоубийственнем граде вниде Господь в церковь Божию, и изгна из нея продающия и купующия, и трапезы торжников ниспроверже. О, коликое множество неподобных и недостойных помыслов, чувствований и желаний гнездится в тебе, душе моя! Изгони убо их и взывай:

Помилуй мя Боже, помилуй мя!

Храм Мой храм молитвы наречется, рече Господь, вразумляя священников и старейшин иудейских, вы же сотвористе и местом купли и вертепом разбойников. О, кольми праведне укор сей всею силою многажды падаше и падает и на нас с тобою, о душе моя! Возскорби о таковем страстнем извращении и взывай:

Помилуй мя Боже, помилуй мя!

По изгнании из храма купующих и продающих, безпрепятственне возмогоша приступити ко Господу хромии, слепии и прочии болящии. Приступиша они, и абие получити исцеление сподобишася. Приступи ко Господу и ты, душе моя, душе слепотствующая, хромлющая и разслабленная, приступи и воззови к Нему:

Помилуй мя Боже, помилуй мя!

Всим, до единаго, видящим славу вшествия Твоего, Господи, во град и чудес, Тобою совершенных, достояше повергнутися к стопам Твоим и благоговейне исповедати Тя Христом Божиим и обетованным Спасителем. Но слепии вожди нарбднии ожесточишася и негодоваху на тех, иже осанна Тебе воспеваша. Хранися и блюдися, о душе моя, от таковыя злобы и ожесточения, часто вещающи:

Помилуй мя Боже, помилуй мя!

Слава: Чистая и невинная уста отроков иудейских возглашаху Ти на пути и в храме, Христе, осанна! Аз же, грешный, моими нечистыми усты вечер и утро взываю Тебе и Отцу Твоему, и Святому Духу:

Помилуй мя Боже, помилуй мя!

И ныне: В вечер днесь Господь, вышед из града, остави его. Мене же, о Христе Иисусе, за маловерие мое и за многая гре¬хи не остави в вечер моего жития, буди со мною при смерти и по смерти, молитвами Пресвятыя Богородицы и святаго Ангела Хранителя моего, да якоже ныне, тогда умиленно взываю:

Помилуй мя Боже, помилуй мя!

 

Песнь 3

Ирмос: Силою Креста Твоего Христе, утверди мое помышление, во еже пети и славити спасительное Твое распятие.

Помилуй мя Боже, помилуй мя!

О, блаженная весе Вифания! В ней бо жительствоваху святии друзи Господа: Ла¬зарь, Марфа и Мария, в ней многажды витаху и упокоевахуся Богочеловек, Матерь Его Пречистая и апостоли. Оная удостоися видети величайшее от Христовых чудес, воскрешение Лазаря. Тамо благоволи Господь проводити последния нощи пред нощию Гефсиманскою. Душе моя, душе моя! Стояй при дверех сердца и толкий, внидет Он и к тебе и водворится у тебе, якоже в Вифании, аще услышим глас Его, аще покаемся и усердно начнем взывати:

Помилуй мя Боже, помилуй мя!

Утру бывшу, Господь, возвращался во Иерусалим, Владыка, даяй пищу всякой плоти, взалка. Сия алчба телесная Господа, яко Человека, да оживит в памяти твоей, душе моя, тую духовную Божественную алчбу Христову, еюже выну алчет Он твоего обращения и сего покаяннаго гласа:

Помилуй мя Боже, помилуй мя!

Не обрете Господь ни единаго плода на смоковнице, при пути стоявшей, и осуди ю на вечное безплодие, рек: да николиже от тебе будет плода во веки. Чесого ожидати тебе, душе моя, яко не сего страшнаго гласа, аще не приидеши в чувство и не принесеши плодов покаяния, взывающи:

Помилуй мя Боже, помилуй мя!

Имейте веру Божию, веща Господь Петру, смоковнице, абие по глаголу Христову изсшей, дивящемуся: аминь, глаголю вам: вся, елика аще молящеся просите, веруйте, яко приимете. Не унывай убо, душе моя, зря в себе некия останки плода онаго древа познания добра и зла: единем мановением Господа изшут они и изторгнутся, аще веру Божию стяжем и не престанем взывати:

Помилуй мя Боже, помилуй мя!

Многое множество словес изрекоша Господу во храме книжницы и фарисее: коею властию сия твориши, торжников изгоняющи? Достоит ли дань даяти кесарю? — и прочая. Ты же, о душе моя, ничтоже мысли, ничтоже глаголи, разве сего Давидова словесе:

Помилуй мя Боже, помилуй мя!

Человек некий име два сына, рече Гос¬подь, от нихже един прежде оказа отцу непослушание, но послежде, раскаявся, иде на повеленное дело. Другий, обещався исполнити волю отца, не исполни ю. Сему вероломному сыну последовала еси, душе моя, ибо безстрашне преступала еси обеты, при Крещении данныя, и обращшися к покаянию, леностно молишися и с нерадением взываеши:

Помилуй мя Боже, помилуй мя!

Душе моя, душе моя! И тебе вверен бысть вертоград, во еже хранити и возделоватии, вертоград Богонасажденный и оплотом Евангелия и благодати огражденный. Ты же, окаянная, уподобилася еси злым делателем, иже не токмо плодов Владыке не воздаша, но и дерзостне Его преогорчиша, кайся убо и плачущи взывай:

Помилуй мя Боже, помилуй мя!

Слава: В царствие небесное, в царствие света и блаженства, призывает нас, грешных, Бог в Триех Ипостасех: Отец, Сын и Дух Святый. Ты же, душе моя, подобно оным званым в притче Господни, дерзостне отреваеши небесное звание Пресвятыя Троицы, вины** некия представляющи, не вступавши на путь, в царствие Божие ведущий, не каешися и не взываеши:

Помилуй мя Боже, помилуй мя!

И ныне: Страшный глагол изрече Домовладыка, узрев на трапезе Своей человека, необолченна в одеяние прилично по безстрашию и презорству: возмите его и вверзите во тьму кромешнюю. О, Пресвятая Дево Богородице! Да не услышу за мою наготу и безобразие сего страшнаго суда, даждь ми день и нощь каятися и взывати:

Помилуй мя Боже, помилуй мя!


 

Песнь 4

Ирмос: Услышах слух силы Креста Твоего, яко рай отверзеся им, и возопих: слава распятию Твоему, Господи.

Помилуй мя Боже, помилуй мя!

Грядый Господь на вольную всеспасительную страсть и смерть, смиряя иудеев, рече: воздадите Божия Богови, кесарева кесареви. Ты же, душе моя, не послужила еси достодолжне ни Богу, ни ближнему. Кайся убо и взывай:

Помилуй мя Боже, помилуй мя!

Грядый Господь на вольную нашего ради спасения смерть, законнику вопросившему: кая заповедь больши есть в законе, отвещаваше: возлюбиши Господа Бога твоего всем сердцем твоим и всею крепостию твоею, и всем помышлением твоим, сия есть первая и большая заповедь. Ты же, о душе моя, не токмо всею полнотою мысли и сердца, но ниже частию их не воз¬любила еси и не любиши Господа Бога Создателя, Промыслителя и Искупителя твоего; воздохни о сем нечувствии и окаменении твоем, и воззови:

Помилуй мя Боже, помилуй мя!

Вторая, первой подобная, заповедь есть, по глаголу Господа: возлюбиши ближняго твоего, яко себе. Ты же, душе моя, на место чистей любве ко ближнему, самолюбствуеши, корыстолюбствуеши, похотствуеши, завиствуеши. О, усугуби убо и утрой покаянный твой вопль:

Помилуй мя Боже, помилуй мя!

Грядый Господь на вольную страсть и смерть, повеле слушати и тыя наставники, иже глаголют, но не творят; ты же, душе моя, не послушала еси и не слушавши богодохновенных и духоносных учителей: пророков, апостолов, Отцев и пастырей Церкве богомудрых. Кайся о сем и взывай:

Помилуй мя Боже, помилуй мя!

Грядый Господь на вольную страсть и смерть, грозно возгласи: горе тем книжником и лицемером, иже очищают внешняя сткляниц и блюда, внутрь же суть полни хищения и неправды. Горе, горе тебе, душе моя, об очищении своих помышлений не радящей, языком токмо, а не и сердцем купно взывающей:

Помилуй мя Боже, помилуй мя!

Грядый Христос на вольную страсть и смерть, возвести и вообрази*** учеником Своим второе пришествие Свое, всеобщий Суд, кончину мира. Помышляющи о сих, ужаснися, душе моя, бодрствуй, кайся, и взывай:

Помилуй мя Боже, помилуй мя!

Юродивым, но не мудрым девам уподобилася еси ты, душе моя, и не имущи елея благих дел, лишена будеши царствия небеснаго, аще не приидеши в чувство покаяния и не воззовеши воплем крепким:

Помилуй мя Боже, помилуй мя!

Слава: Не поревновала еси ты, душе моя, рабу верному и доброму, добре умножившему вверенный ему от Господа талант; но уподобилася еси рабу ленивому, данный ему талант в землю сокрывшему, и яко неключимая, ввержена будеши во тьму кромешнюю, аще не поспешиши останок жития твоего проводити в трудех и покаянии, выну взывающи:

Помилуй мя Боже, помилуй мя!

И ныне: О, Пресвятая и Преблагословенная Приснодево Марие! Да не услышу с девами юродивыми страшнаго словесе: не вем вас,— даждь ми и усты, и сердцем непрестанно взывати:

Помилуй мя Боже, помилуй мя!

 

Песнь 5

Ирмос: Просвещение во тьме лежащих, спасение отчаянных, Христе Спасе мой, к Тебе Утреннюю, Царю мира, просвети мя сиянием Твоим, иного бо разве Тебе Бога не знаю.

Господи, прежде даже до конца не погибну, спаси мя.

Грядый Господь на вольную страсть и смерть, предызобрази, како приидет на конец веков в славе Своей, и вси святии Ангели с Ним, како сядет на Престоле славы Своея, како соберутся пред Ним вси народи, како разлучит всех человеков, и праведных поставит одесную, а грешников ошуюю. Услышавши, душе моя, сия последняя вещания Господня, ужаснися Суда сего и в покаянии взывай:

Господи, прежде даже до конца не погибну, спаси мя.

Взалкахся, речет Господь сущим одесную, и даете Ми ясти; ты же, о душе моя, напитала ли еси Христа в лице меньших братий? Кайся убо и вопий:

Господи, прежде даже до конца не погибну, спаси мя.

Возжадахся, речет Господь праведным, призывая их в царствие Свое, и напоисте Мя, странен бех, и введосте Мя. Ты же, грешная душе моя, ни чаши воды студеныя, ни приюта и упокоения не предложила еси со Авраамовым усердием Господу, жаждущему и странну в лице нищих и убогих. Сокрушайся убо, болезнуй и взывай:

Господи, прежде даже до конца не погибну, спаси мя.

Наг бех, и одеясте Мя, болен, и посетисте Мя, в темнице бех, и приидосте ко Мне, речет Господь наследником вечнаго блаженства. Ты же, о душе моя, ни единаго от сих благих дел сотворила еси меньшей братии Христовой. Чесого за твое жестокосердие ожидати тебе, яко не геен¬ны, аще не припадеши к Человеколюбцу со слезами и молением:

Господи, прежде даже до конца не погибну, спаси мя.

Грядый Господь на вольную страсть и смерть, благоволи внити в дом Симона, от проказы исцеленнаго, и вечеряти у него со святыми ученики Своими и со Пресвя¬той Материю Своею. Жена же некая тамо, прияв сосуд мира многоценнаго, возливаше оное на главу Господа, купно с миром слезы любве и благодарности к Нему изливающи. И ты, грешная душе моя, проливающи слезы покаяния и ими нозе Господа орошающи, взывай:

Господи, прежде даже до конца не погибну, спаси мя.

Грядый Господь на вольную страсть приближися ко Иерусалиму, и воззрев нань, плакася о нем, плакася об ожесточеннем ослеплении его и о предстоящем бедствии его. Плачи и ты, душе моя, помышляющи злая дела твоя и страшное наказание за ня, плачи, взывающи:

Господи, прежде даже до конца не погибну, спаси мя.

Душе моя, душе моя, слышала еси соболезнующее, но и страшное последнее слово Господа ко Иерусалиму и всему народу иудейскому: Иерусалиме, Иерусалиме! Коль краты восхотех собрати чада твоя, якоже кокошь собирает птенцы своя под криле, и не восхотесте. Се оставляется дом ваш пуст! Устрашися, убойся, да не оставит тя благодать Божия за противление твое, и воплем велиим воззови:

Господи, прежде даже до конца не погибну, спаси мя!

Слава: Вся силы твоя, о душе моя, да приидут и поклонятся Богу Отцу, Богу Сыну и Богу Духу Святому, и да воззовут: Троице Святая, Единосущная, Единодержавная! Прежде даже до конца не погибну, спаси мя.

И ныне: Грядет, грядет Воплотивыйся от Тебе, Пресвятая Дево, Единородный Сын Божий волею пострадати и распятися на Кресте, да спасет мя вопиюща: Господи, прежде даже до конца не погибну, спаси мя!

 

Песнь 6

Ирмос: Молитву пролию ко Господу и Тому возвещу печали моя, яко зол душа моя исполнися, и живот мой, аду приближися, и молюся, яко Иона: от тли, Боже, возведи мя.

Помилуй мя Боже, помилуй мя!

Сия нощь, в нюже Христос наш предан бысть от злонравнаго ученика Своего и бысть истязуем, бием, поруган, судим и осужден, от веков есть предопределенная, великая и страшная нощь, юже сотвори Господь, да не во сне и дремании проводим ю, душе моя, но во бдении, во умиле¬нии и в слезном взывании:

Помилуй мя Боже, помилуй мя!

Душе моя, душе моя! Приникни в Сионскую горницу и виждь, како воплощшееся Слово, Богочеловек, пред Тайною Вечерию преклоняется ниц и умывает нозе учеником, да сокрушит гордыню твою и смирению тя научит. Ты же не уразумела еси сего, не последовала еси примеру Господа твоего; покайся убо и взывай:

Помилуй мя Боже, помилуй мя!

Душе моя, душе моя! Петру, иже весь бе чист, предлежаше лишенным быти части со Христом, аще не умыются нозе его от Господа. Како убо возможеши ты наследовати царствие небесное, аще благодать Духа Свята не очистит сердце твое и помышления нечистыя, скверныя, слезами покаяния неомовенныя, и аще не воззовеши ко Очистителю:

Помилуй мя Боже, помилуй мя!

Святии апостоли Петре, Иоанне, Иакове, Андрее, и вси святии славнии единонадесяте апостоли! Лобызаю ваша ноги, омытыя пречистыма рукама Господнима, лобызаю ваша руки, приявшия от Господа на Тайней Вечери под видом хлеба Тело Его и под видом вина самую Кровь Его. Молю вы, научите мя приимати сие чудное Брашно и Питие со страхом и любовию, и с покаянным молением:

Помилуй мя Боже, помилуй мя!

О, блаженны и преблаженны ушеса ваша, слышавшая вещавшаго вам Господа: приимите, ядите, сие есть Тело Мое, еже за вы ломимое во оставление грехов; пийте от нея вси, сия есть Кровь Моя, яже за вы и за многия изливаемая во оставление грехов! Вашими молитвами, святии апостоли, да причтуся к тьмочисленному множеству спасительно и животворно приемлющих Тело и Кровь Христову; да причтуся к ним и аз, вопиющий и взывающий:

Помилуй мя Боже, помилуй мя!

Грядый Господь на вольную страсть велию любовь к вам, святии апостоли, и ко всем Своим, сущим в мире, показа и, умыв ноги ваша и отер их лентием, неизреченно вящшую и большую любовь и благодать Свою яви, преподав в пищу и в питие Тело и Кровь Свою. О, аще бы ты, душе моя, уразумела высоту, глубину, широту и бесконечность сея любве Христовы, аще бы благонадежно и со дерзновением возмогла взывати:

Помилуй мя Боже, помилуй мя!

По Тайней Вечери рече Господь Симону Петру: Симоне, Симоне! Се сатана просит, дабы сеял вас, яко пшеницу, Аз же молихся о тебе. Душе моя, душе моя! Аще Петру угрожаше таковый страх, не паче ли тебе? Молися убо, да не оскудеет вера твоя николиже, наипаче же при исходе твоем из мира сего; молися ко Христу Богу и взывай:

Помилуй мя Боже, помилуй мя!

Слава: Ко Отцу Моему гряду, глаголет Господь, утешая ученики Своя пред исходом из Сионския горницы в Гефсиманию и послежде на Голгофу. И Аз умолю Отца, и инаго Утешителя даст вам, Духа Святаго, Духа Истины. К ходатайственному молению Сына Божия, совокупи и ты, душе моя, покаянную молитву свою и взывай к Нему и Его Отцу, и Духу Святому:

Помилуй мя Боже, помилуй мя!

И ныне: Болящую душу мою исцели, Рождшая всех Вземлющаго недуги, и научи мя благоприятне на всякое время и на всякий час, паче же в час смертный взывати:

Помилуй мя Боже, помилуй мя!

 

Песнь 7

Ирмос: Согрешихом, беззаконновахом, неправдовахом пред Тобою; ниже соблюдохом, ниже сотворихом, якоже заповедал еси нам, но не предаждь нас до конца, отцев Боже.

Помилуй мя Боже, помилуй мя!

Грядый Господь по Тайней Вечери в Гефсиманию, глагола учеником Своим: Аз есмь Лоза истинная, и Отец Мой делатель есть, всяку розгу о Мне не творящую плода, Он отсекает. Ты, о душе моя, ни в юности, ни в лета мужеска, ниже во старчестве не принесла еси плода угоднаго Отцу Небесному. Страшися убо, да не отсечена будеши от живоносныя Лозы Христа и взывай:

Помилуй мя Боже, помилуй мя!

На пути Своем от Сиона в Гефсиманию вещаше Христос: аще кто во Мне не пребудет, извергнется вон, якоже неплодная ветвь, и изсхнет, и во огнь ввергнется. Ты, о душе моя, аще и сочеталася еси со Христом во святем Крещении, но не пребыла еси во соузе с Ним и вероломне преступила еси обеты твоя. Чесого же ожидати тебе, яко не извержения вон из чертога небеснаго, аще, кающися и плачущи о вероломстве твоем, не умилостивиши Господа слезным воплем:

Помилуй мя Боже, помилуй мя!

Дух Святый, Егоже обещал есть Господь послати от Отца возлюбленным учеником Своим, выну пребудет Утешителем и миродателем, неверующим же обличитель явится. И, пришед, Он, якоже рече Господь, грядый на страдание, обличит мир о гресе и о правде, и о суде. Недостойная утешения Духа Утешителя, грешная душе моя, прими смиренно Его обличительное вразумление и не престани взывати:

Помилуй мя Боже, помилуй мя!

Приникни, о душе моя, и виждь, яко Христос Господь, к Гефсимании приближився, приклоняет колени Своя, возводит очи Своя на небо, молящеся Отцу Своему о Себе Самем: Отче! Прииде час страданий Моих за спасение мира. Молится об апостолех: Отче Святый! Соблюди их во имя Твое, да будут едино, якоже и Мы. Молится о всех верующих: Не о сих же молю токмо, но и о верующих словесе их ради в Мя. Да и ты, душе моя, общница будеши силы и плодов сей великия Первосвященническия молитвы Христовы, веруй в Него, исповедуй Его, кайся в согрешениих своих и взывай:

Помилуй мя Боже, помилуй мя!

Прискорбна есть душе моя даже, до смерти, глагола Господь в саду Гефсиманстем. О чесом токмо скорбит и печалует Всеблаженный, Вседовольный, Всесовершенный? Скорбит, яко мы, неблагодарная тварь, вся заповеди Божии преступихом, яко правосудие Его оскорбихом и не каемся, не чувствуем гнева Божия и не взываем:

Помилуй мя Боже, помилуй мя!

Сын Божий, Богочеловек, в саду Гефсиманстем скорбит, тоскует, падает ниц, толико крепце молится, яко молищуся Ему, бе пот Его, яко капли крове, каплющия на землю. Мы же, о душе моя, в нечувствии есмы, дремлем, спим и не взываем:

Помилуй мя Боже, помилуй мя!

Что спите, рече Господь Петру и двум сыновом Зеведеовым, ― восставше молитеся, да не внидете в напасть. Восстани, воспряни и ты, душе моя, молися и взывай:

Помилуй мя Боже, помилуй мя!

Егда Христос, Ходатай наш, в саду Гефсиманстем скорбе скорбию смертельною, бе моляся до пота кроваваго и предая всего Себе в волю Отца Небеснаго, взывая: Отче, аще волиши мимонести от Мене чашу сию, обаче не Моя воля, но Твоя да будет; тогда явися к Нему Ангел Господень и укрепляше Всесильнаго. Послется Ангел и ко всяцей души, предающей себе в волю Божию, кающейся и крепце вопиющей:

Помилуй мя Боже, помилуй мя!

Слава: В час, егда сладце беседова Господь со ученики на пути в Гефсиманию, егда молися Он прежде даже не внити в сад и в самем саду, в час сей несчастнейший от архиерей Каиафа совеща с несчастнейшим от всех земнородных Иудою, како удобее яти Господа, и вдаяше буйствующую толпу стражником со оружии, и идоша тии тайными и глухими стогны Святаго Града, да не узрят их народи Иерусалимстии. Ангели же и Архангели ужасахуся и трепетаху, видяще сие лукавое богоубийственное шествие. Мы же, о душе моя, в сокрушении сердца не престанем взывати:

Помилуй мя Боже, помилуй мя!

И ныне: О, уведите и уразумейте сию страшную тайну соборища, Иудою предводимаго, опасне сокрываемую от вас и от всего народа; разумейте ю святыя жены: Марие Магдалино, Саломие и другия, и Пречистая Дева Матерь Господа, и взывайте со мною вкупе:

Помилуй мя Боже, помилуй мя!

 

Песнь 8

Ирмос: Ужаснися бояйся небо, и да подвижатся основания земли: се бо в мертвецех вменяется в вышних Живый и во гроб мал странноприемлется. Егоже страсти помяните, погребение воспойте и превозносите Его во вся веки.

Помилуй мя Боже, помилуй мя!

Вопроси некогда Господь пророка Иеремию: что видиши? Вопрошу и аз тя, грешная душе моя, что ты видиши, на лице Господа взирающи и в нощь сию Ему последующи? Вижду Господа моего Иисуса Христа в саду Гефсиманстем ятаго, связаннаго, чрез поток Кедрский ведомаго наглыми, слугами Каиафовыми; вижду Его единым от ученик преданнаго, всеми прочими оставленнаго, ужасаюся и взываю:

Помилуй мя Боже, помилуй мя!

Вижду Господа моего, Единороднаго Сына Божия Иисуса Христа, ко Анне, тестю Каиафину приведеннаго, тамо об учении Его истязуемаго, в ланиту заушаемаго. Вижду сия и ужасаюся, помышляя, яко греси наши виною толикаго уничижения Христова, и вопию:

Помилуй мя Боже, помилуй мя!

Вижду Господа моего связаннаго, окровавленнаго и от Анны к Каиафе первосвященнику ведомаго, слышу зде многая ложная на Него свидетельства и наветы; вижду, како Он, яко агнец безгласный, не отверзает уст Своих во еже защитити Себе, вижду сия и, окаявая свою нетерпеливость и малодушие, взываю:

Помилуй мя Боже, помилуй мя!

Вижду, како Господь мой Всесвятый, Иисус Христос от Каиафы первосвященника и от несмысленнаго соборища иудейскаго обвинен, како оглашен богохульником и законопреступником; како осужден на смерть, како, многи поругания и биения претерпев, ввержен в темницу до утрия; вижду сия и ужасаюся, поминая, яко за мои грехи страждет Господь, и взываю:

Помилуй мя Боже, помилуй мя!

Вижду, како абие наутрие Господь, связанный и стрегомый, из темницы изведен, како представлен Каиафе последняго допроса ради во общем всех судий иудейских собрании, и како, твердо ясне Господу отвещавшу, яко есть Мессия, вси единогласне изрекоша повинен есть смерти. Вижду сия и, ведая, яко моих ради беззаконий Отец предал есть Сына Своего на смерть, слезно взываю:

Помилуй мя Боже, помилуй мя!

Вижду, како многая стража, с самими судиями иудейскими, повлекоша Господа, во дворе Каиафы измученнаго, к Понтийскому Пилату, да предаст Его на крестную смерть; како властитель сей, аще и мнози быша обвинительнии вопли, ни единыя обрете вины в Небеснем Осужденнике, и како непреклонне иудейския начальницы, яко изверги, жаждаху видети Господа на Кресте. Вижду сия и ужасаяся о толицей злобе и ослеплении сердца человеческаго, с плачем вопию:

Помилуй мя Боже, помилуй мя!

Вижду, како Господа моего Иисуса Христа, аще и яве для всех неповинен бе, по стогнам Иерусалима влачат от единаго судилища до другаго: от Пилата ко Ироду Галилейскому; како Он во дворе сего убийцы Предтечева уничижен бысть, осмеян, к безумным причтен; како во одежде посмеяния паки в преторию Пилата приведен. Вижду сия, стыждуся дел моих; таковое поругание Господу славы повлекших, и не престаю взывати:

Помилуй мя Боже, помилуй мя!

Слава: Вижду, како малодушный Пилат, зверскую неистовую злобу врагов Господа укротити желая, преда Его бесчеловечным воином на многообразная мучения. Како они пречистое тело Его обнажиша, како к позорному столбу Его привязаша, како бичами и терновыми розгами по главе и раменам Его ударяху, како венцем от терния венчаху, како ругахуся, преклоняющеся пред Ним, по лицу ударяюще и очи Ему закрывающе. Вижду сия и ужасаюся, поелику за мое окаянство тако страждет Господь, повергаюся ниц и тысящекратно взываю:

Помилуй мя Боже, помилуй мя, Боже Отче, помилуй мя, Боже Слове, помилуй мя, Боже Душе Святый, помилуй мя!

И ныне: О, Пресвятая и Преблагословенная Дево Марие! Аще и предан в руки врагов Сладчайший Иисус, превожделеннейший Сын Твой, аще и поруган, изму¬чен и яко злодей осужден обетованный Искупитель мира, но Божий есть Сын, Господь небесе и земли. Помяни мя во царствии Его и во Твоем с Ним соцарствии, помяни и спаси душу мою, вопиющую к Нему:

Помилуй мя Боже, помилуй мя!

 

Песнь 9

Ирмос: Не рыдай Мене Мати, зрящи во гробе, Его же во чреве без семене зачали еси Сына: возстану бо и прославлюся, и вознесу со славой непрестанно, яко Бог, верою и любовию Тя величающия.

Помилуй мя Боже, помилуй мя!

Вопрошен бысть пророк Иеремия вторицею от Господа: что ты видиши? Вопрошу и аз тебе, многогрешная душе моя, что ты видиши? Что видиши днесь, в шестый день Страстныя и страшныя Седмицы? Вижду Господа Иисуса Христа долготерпеливно и безмолвно внимающаго чтомому с лифостротона Липатову приговору, еже да распят будет на Кресте; вижду Его грядущаго на Голгофу и под тяжестию несомаго Им Креста изнемогающаго; иду в след Его, покланяюся Ему и, моля взяти и моя вся согрешения на всеочистительный Крест, взываю:

Помилуй мя Боже, помилуй мя!

Вижду пречистое, пресвятое, от Пречистыя и Пресвятыя Девы Марии неизреченно рожденное Христа моего тело за спасение мира на Кресте вознесенное, все окровавленное, все уязвленное, от ног до главы целости не имущее, вижду и в трепете исповедуя распятому Богочеловеку грехи юности и неведения моего, взываю:

Помилуй мя Боже, помилуй мя!

Вижду те пресветлеи очи, яже на всех благоприветливо и любезне взираста, от ихже воззрения печальнии утешахуся, унылии ободряхуся, грешнии к покаянию обращахуся; вижду сии радостотворнеи очи Христовы за моя нечистая и лукавая воз¬зрения потемненными, кровию облиянными, и, каяся о мнозем от мене злоупотреблении чуднейшаго из всех чувств телесных, вопию и не престану вопити:

Помилуй мя Боже, помилуй мя!

Вижду причистая уста, от нихже непрестанно струися неизсякаемый поток небесныя сладости, яже изрекаху сладчайшия глаголы живота, света и премудрости; вижду сии уста Христа моего, за празднословие, буесловие, злословие, кощунство моих устен оцтом и желчию напоенными, жалею о всех грехах языка моего и взываю:

Помилуй мя Боже, помилуй мя!

Вижду пречистая, к молитве нашей преблагопослушливая ушеса Господа моего Иисуса Христа, за грехи моих ушес, за мое слышание клевет и наветов на ближняго, пересудов и осуждения начальства, за отвращение от слышания Божия слова, за сия и иныя моя грехи преогорченныма и многих поношений, руганий и злейших обвинений исполненныма. Повергаюся пред распятым Господом моим Спасителем и взываю:

Помилуй мя Боже, помилуй мя!

Вижду руце, пречистеи руце, от ихже прикосновения смерть содрогашеся, яже всецелебным беста врачевством противу всякаго недуга и всякия болезни, в нихже малыя хлебы до преизобилия умножахуся, яко да многия тысящи насытят, вижду сии руце Господа моего за беззаконная деяния руку моею острыми железными гвоздьми пронзенныма, от вязания посинелыма, кровь обильною струею источающима; вижду их и жалостию истаяваю, и в сокрушении о содеяннем мною во всем житии моем, взываю:

Помилуй мя Боже, помилуй мя!

Вижду нозе, яже шествоваста по водам, яко по суху, яже грешница омы слезами своими и прият отпущение грехом своим; нозе, ихже аще кто сподобится быти подножием, вышше мира всего будет, вижду сии пречистеи нозе моего Господа Иисуса Христа за богопротивное хождение моею ногу по многоразличным путем неправд и нечестия, якоже и руце Его, ко Кресту пригвожденныма, потоки крове лиющима, вижду их, содрагаюся, воспоминая хождения и исхождения моя, и в покаянии взываю:

Помилуй мя Боже, помилуй мя!

Слава: Вижду Господа моего, на Кресте, во еже спасти мя страждущаго, жаждою палимаго, слышащаго поношения, надсмеяния и ругания, вижду солнце помрачившееся, землю трясущуюся, камение распадающееся, слышу поледнее слово Распятаго: Отче, в руце Твои предаю дух Мой. Вижду Жизнодавца бездыханна и умерша, трепещу, ужасаюся и бия в перси моя многогрешныя, всем существом моим взываю:

Помилуй мя Боже, помилуй мя!

И ныне: Вижду Пресвятую, Пречистую Деву Марию у Креста Господа и Сына Своего предстоящую, оружием жалости и скорби матерней пронзеннную. Вижду, како един от воин ребра Господу прободе и абие кровь и вода изыдоша. Вижду Никодима и Иосифа, трепетными руками снемлющия со Креста пречистое тело Его, в плащаницу чистую то облекающия и во гробе нове полагающия. Покланяюся Ему, лобызаю живоносныя язвы Его, и ниц повергнувся, усты и всем сердцем взываю и пою:

Помилуй мя Боже, помилуй мя!

Молитва

О, Пресвятая Дево, Мати распятаго за мя Господа моего! О, святый Ангеле Хранителю мой! О святый Предтече Господень Иоанне и святая Марие Магдалино! О, святии апостоли Петре и Павле, Иоанне, Иакове и прочии! О, святителие Христови Николае, Димитрие, Митрофане, Филарете и Тихоне! О, преподобнии отцы Антоние и Феодосие Киево-Печерстии, Сергие и Никоне Радонежстии, Серафиме Саровский, Амвросие и прочии отцы Оптинския и вси преподобнии! О, святии праведнии Иоанне Кронштадский и Алексие Московский! О, святая великомученице Варваро и прочии мученицы! О, святии новомученицы и исповедницы российстии! О, святии блаженнии Ксение и Матроно и прочии блаженнии и юродивыя Христовы! Явите мне грешному небесную милость вашу, и имиже весте судьбами, благоустройте, да не будет отриновен покаянный вопль мой, но да приимется и да вознесется ко Престолу Пресвятыя Троицы, Отца и Сына, и Святаго Духа, и да низведет в душу мою свет, и мира, и успокоение, сладость и вечное неотъемле¬мое радование о Дусе Святе, Ему же со Отцем и Сыном буди слава и поклонение во веки. Аминь.*

---------------------------------------
Взято из сборника «Откуду начну плакати окаянного моего жития. Редкие покаянные молитвословия». — М., 2006.

Канон составлен по св. Евангелию Преосв. Иеремией (Соловьевым, † 1884), еп.Нижегородским.

Страстная седмица
Покаянный канон еп.Иеремии Нижегородского

Ми оголошуємо благодійну передплату. Допомогти можна, перераховуючи щомісяця необтяжливу для вас суму на:

  • Карту «Приватбанку»
  • Webmoney — R504238699969, U862362436965, Z274044801400
6662

0

Коментарі

Всі нові коментарі будуть відображені після проходження обов’язкової процедури модерації

Додати коментар